Philippines-in EU ṭanpuina hnar

Philippines chuan European Union aṭanga ṭanpuina an dawn tur chu a hnar.

Execurtive Secertary Salvador Medialdea chuan EU aṭanga ṭanpuina an dawn tur, dollar maktaduai 278.88 chu an hnar thu sawiin, hei hi an ram chhung inrelbawlna kawnga EU inrawlh tur an venna a nih thu a sawi.

Philippines President Rodrigo Duterte-a’n an rama ruihhlo do beihpui a thlak a kalpui dan chu Europe ram te hian an sawisel a, ruihhlo zuar mi sang tel thah an nih avangin sorkar chetdan chu an dem thu an lo sawi tawh a ni. Hetianga an sawisel avang hian President Duterte pawh a lawm hlo hle a ni.

Nikum June 30-a President office a luah aṭangin, President Duterte kaihhruai sorkar hian ruihhlo lakah beihpui a thlak nghal a, beihpui thlak a nih aṭang hian ruihhlo hmangsual leh zuar ṭhin mi 9,000 dawn thah an ni tawh nia sawi a ni. Police-te chuan thi zinga hmun thuma ṭhena hmun khat chu police officer-te’n mahni invenna atana an kahhlumte niin an sawi.

Ramdangin an drug war policy an sawisel ṭhin chu President Duterte hian a ngaithei lo hle a, nikum October thla khan Europe leh US chuan a policy kalpui mek an pawmpui thei lo a nih chuan ram tana hmasawnna hna thawhna kawnga puihna an pek ṭhin pawh tihtawp mai turin a lo vau tawh a ni. Hetih lai hian Economic Planning Minister Ernesto Pernia chuan sorkarin Europe ram

aṭanga chhawmdawlna a hnar chung­changah thutlukna hi an la siam dang­lam leh mai thei niin a sawi.

EU hian kum 2007-2013 chhung khan Philippine ram ṭanpuina atan hian euro maktaduia 130 a pe a, kum 2015 khan kum li chhunga hmasawnna project thawhna atan euro maktaduai 325 pek a lo tiam tawh bawk.