Sri Lanka President in banna thehlut President lailawk atan PM lalut dawn

Sri Lanka Parliament speaker Mahinda Yapa Abeywardena chuan nimin khan president Gotabaya Rajapaksa chuan banna a thehluh thu puangin, prime minister Ranil Wickremesinghe chu President lailawk atana lakluh a nih tur thu a sawi.

Speaker Abeywardena chuan ram dang tlanchhe mek, Gotabaya Rajapaksa hnen aṭang hian banna lehkha a dawn tawh thu sawiin, dan ang takin President a nihna leh a mawhphurhna aṭangin a inhnukdawk a ni, a ti. Banna a thehluh tak avangin ram danpui hmanga President thar an thlang thei dawn tih a sawi bawk.

Abeywawrdena chuan Parliament chu July 16-ah ṭhutkhawm a nih tur thu sawiin, he huna tel vek tur hian Parliament member-te a ngen nghal a ni. Democracy kalphung ang taka President thar hi thlan a nih theihna turin party hrang hrang hruaitu, state official leh security force-te chu thawhhona ṭha tak nei turin a sawm a, mipuite pawh Parliament rorel inkhawm tluang taka an neih theihna tura boruak ṭha siam turin a ngen bawk a ni.

Sorkar laka lungawi lohna lantira mipuiten nawrh an huaihawt pawh Ningani aṭang khan a boruak a dai ṭan a, Colombo kawtthlera nawrh huaihawtte pawhin sorkar building an luhkhungte pawh an chhuahsan leh tawh a ni. Nawrh huaihawttu zinga an thupuangtu chuan Presidential palace, Presidential Secretariat leh Prime Minister Office-te an chhuahsan thu a sawi a, mahse an lungawi lohna erawh lantir chhunzawm zel an tum tih a sawi.

April thla aṭang khan mipui hian an ram economy tlahniam zel vangin lungawi lohna hi lantir ṭanin, Inrinni liam ta khan presidential palace luhkhungin, prime minister mimal in pawh an halsak bawk a ni