North Korea-in Ukraine aṭanga inlahrang bial a pawm

Russia-Ukraine indona thleng mekah Russia an thlawp zia lantirin, North Korea chuan Ukraine aṭanga inlahrang bial pahnihte chu independent ramah a pawm tih a sawi.

NKorea hian Ukraine-a buaina thleng mekah US chu mawhphurtuah puhin, ram dang laka invaivung a tumna avangin Russia chuan invenhim a tumna lakah Ukraine-ah beihpui a thlak phah a ni, a ti.

Ningani khan NKorea foreign minister Choe Sun Hui chuan Ukraine lak aṭanga inlahrang, Donetsk leh Luhansak bial hruaitute hnenah lehkha thawhin, ram hrang anga a pawm thu leh, heng ram pahnihte nen palai intirh tawn a duh thu pawh a hrilh a ni.

Ukraine foreign ministry chuan NKorea laka lungawi loin, an inzawmna pawh a chhu chat nghal a, NKorea chu Ukraine ram inrelbawlna leh thuneihna ngaipawimawh loah a puh.

Donetska-a inlakhran duhtu pawl hotu chuan North Korea ram thutlukna siam chu lawmawm a tih thu a sawi. Ukraine khawchhak lama Luhansk leh Donetsk hi Donbas region-a awm an ni a, Russia ṭawng hmangtu an tam zawk. Ukraine laka inlakhran duhtuten heng province pahnih hi kum 2014 aṭang khan an thunun tawh a ni. Russia president Vladimir Putin chuan February thlaa Ukraine an run hnuah, independent ramah a pawm thu a puang a, Syria pawhin a pawm zui ve leh a ni.