China-in a ram chhung thila inrawlh lo turin US hriattir

China chuan July 1 aṭanga Hong Kong-a national security law hman chungchangah, ram chhung thil a nih avangin inrawlh lo turin US a hriattir.

China foreign ministry chuan dan kalh lo zawnga a ram china thuneihna China-in a hmang hi a tih tur a nih thu a sawi. US leh Hong Kong inremna Hong Kong Autonomy Act 1992 chu sawiselin, hei hi China leh Hong Kong tihchhiat tumna a ni tiin, US chuan dawt hmangin China a puh fo ṭhin thu a sawi.

US president Donald Trump chuan Thawhlehni khan executive order a tichhuak a, China laka a lungawi loh avangin Hong Kong nena insumdawn tawnna a titawp a, hei bakah hian Chinese official, sumdawnna leh bank lama US-in a thawhpuite hrek theihna tur pawh a siam a ni. 

Hong Kong nena insum­dawn tawnna a tihtawpna chhan hi China-in Hong Kong-a national security law a hman vang a ni a, he law hi Hong Kong mite zalenna rahbehna a nih thu Trump chuan sawiin, "Tunah chuan Hong Kong chu mainland China nen ang khat reng a ni tawh a, Hong Kong chuan US aṭanga hamṭhatna a hmuh te, ecomony lama chhawmdawlna pek a nih ṭhin leh technology lama ṭanpui a ngaih ṭhinna te chu law thar hian a tihbosak a ni," tiin Trump chuan a sawi. 

Hengte avang hian Trump chuan Hong Kong mipui ṭhen­khat chuan an ram hi an chhuah­san nual a rin thu a sawi bawk.