France leh Spain-ah Ram kangin zual lam la pan zel

Spain leh France-a ram kang chuan zual lam a la pan zel. Kangṭhelhtuten theihtawp chhuah mah se khaw lum zual zel avangin ram kang hi a la ziaawm thei lo. Mediterranean lamah ram kang hi a la darh zel bawk.

France rama tourist region lar tak, Gironde bialah chuan ram kang vang hian Inrinni tlai thleng khan mi 14,000 chu hmun him lamah sawnchhuah an ni tawh. Kangṭhelhtu 1,200 chuangten ram kang hi an ṭhelh mek.

Kar eng emaw zat chu France bakah Europe ram dang, Portugal leh Spain-ah ram hi a kang tawh a ni. Zirtawpni liam ta khan Gironde bialah ram hectare 7,300 zau leh, Inrinni-ah ram hectare 10,000 chuanga zau a kang hman. Hetih lai hian France ram khaw lum hian zual lam a la pan zel bawk a, vawiin hian khaw lum lam hian 40 degree Celsius a kai dawn nia sawi a ni.

Spain-ah pawh ram kang ṭhelh hna hi ngawrh taka thawh mek a ni a, Inrini khan khaw lum lam hian 45.7C a kai a ni. Spain ramah hian kar khat chuang khaw lum hian zual lam a pan tawh a, khawlum kaihhnawihah hian mi 360 an thi tawh.

Mijas bula ram kang nasa tak avangin a chhehvela cheng, mi 3,000 chuang chu hmun him lama sawnchhuah an ni tawh. Extremadura region-a Casas de Miravete bula ram kang chuan ram hectare 3,000-a zau a kang chhe tawh bawk. Kangmei hian Monfrague national park a thlen tawh avangin a bula khaw pahniha chengte chu insaseng tura hriattir an ni.

Portugal-ah chuan khaw lum lam hian tlakhniam lam a pan. Kumin chhungin kangmei chhuak hian ram hectare 39,550-a zau a tichhe tawh, nikum aiin ram kangin a tichhiat hi a let thum zetin a tam zawk. Portugal Health Ministry chuan July 7-13 inkar khan an ram boruak lum lutuk vangin mi 238 an thi niin a tarlang a, an zinga a tam zawk chu kum upa lam an ni.

Morocco ramah pawh ram ngaw hectare 2,000 chuanga zau a kang tawh a, kangmei chhuak vang hian mi pakhat a thi. Khaw hrang hranga cheng mi 1,000 chuang chu hmun him lamah sawnchhuah an ni tawh.

Greece-a kangṭhelhtute pawhin Athens chhim chhak lam, Feriza area leh Rethymno bula Crete tuipui kama ram kang ṭhelh mih tumin an bei mek. Rethymno bula thingtlang khaw sarih-a chengte pawh hmunhim lamah an inthiarchhuak tawh a ni.