Israel PM Netanyahu bang turin phût
Israel prime minister Benjamin Netanyahu bang tura phûtin Jerusalem-a a chenna in kawtah Thawhlehni khan mi eng emaw zatin nawrh an huaihawt. Hripui leng mek dona kawngah sorkar hmalak dan sawiselin Inrinni khan nawrh hi an lo huaihawt tawh bawk. Thawhlehni khan pungkhawmte chuan an ram tana ṭha lo ber chu hri leng mek chu niloin eirukna zawk a ni tiin, thamna laa puhna thubuai nei PM hi bang turin an phût.
May thla khan Netanyahu hi thamna lak leh a thuneihna hmang dik loa puhna thubuai pathum siamsak a ni. July 19-ah Jerusalem district court-ah ngaihtuah chhunzawm a ni ang. PM hi thubuai nei mek mah se, an ram dan hnuaiah chuan thiam loh chantir a nih hma chuan a ban kher a ngai lo. Hei vang hian Netanyahu thubuai pawh hi hun eng emaw chen ngaihtuah a ngaih dawn avangin PM nihna hi a la chelh chhunzawm theih reng dawn a ni.
Israel ramah hian Covid-19 kai an pun belh zel a, hripui leng hian an ram economy pawh a nghawng na tawh hle. Hna thawh nei lo, unemployment rate pawh 20% a chuang tawh a ni. Hri kai hmuh chhuah tawh hi mi 41,200 an tling tawh a, mi 368 in an thihpui tawh bawk.