US sorkarin ram dang zirlai chhuah tir tumna sût

US sorkar chuan ram dang zirlai, an rama awm mek zinga online class chauh kalte haw tir an nihna tur thupek,  July 6-a a tihchhuah chu na taka sawisel a nih hnuah a sût leh. 

Sorkar thupek tihchhuah hian sawisel a tawk nasa hle a, zirna in hrang hrang bakah state 17-in an khing zui bawk. Khingtu zingah hian Harvard University leh Massachusetts Institute of Technology (MIT) pawh an tel. American IT company lian Google, Facebook, Microsoft te pawhin MIT leh Harvard hi an thlawp a ni.  

Thawhlehni khan Harvard leh MIT-in sorkar thupek an khinna hi ngaihtuah a nih hnuin, sorkar chuan ram dang zirlaite chungchanga thupek a siam hi a sût leh tih Boston-a federal district judge chuan a sawi. Hri pui leng vangin US-ah pawh zirna in te khar a ni a, online class-a kalpui a ni hlawm a ni. Sorkar chuan zirlai, an zirna ina online class chauh kalpui te chu US-ah an awm chhunzawm zel a ṭulna a awm lo tiin, zirna pangngaia  kalpuina hmuna an insawn emaw a nih loh chuan an visa tihtawp sak an ni ang, tiin a sawi a ni. Mahse a thupek hi sût a nih leh tak avangin ram dang aṭanga zirlai kalte tan harsatna a awm zui dawn ta lo a ni. 2018-2019 academic year-ah US-ah hian ram dang mi zirlai nuai 10 chuang an awm a ni. 

US commerce department-in a tarlan danin, kum 2018-a ram dang zirlaite aṭanga an sum lakluh hi US dollar tluklehdingawn 45 a tling.