Iran President atan Rouhani thlang nawn

Iran President ṭanglai, Hassan Rouhani chu a term hnihna chelh chhunzawm tura thlan tlin a ni.

Kar kalta Zirtawpni-a Iran president thar tur thlanna neih takah khan President Rouhani hian vote tla aṭangin 57% a hmu phak a ni. Interior Ministry chuan Inrinni khan inthlan result hi puangin, Rouhani hian vote 23,549,616 a hmu a, amah hnaih bertu Ebrahim Raisi chuan vote 15,786,449 hmuin vote tla aṭangin 38.5% a hmu pha a ni.

Kumina Iran inthlan hi vote tlak ṭhat ber tum a ni a, vote thlakna hmun hrang hrangah vote thlak tuma intlar an tam em avangin vote thlak theih hun pawh hi pawhsei a ni. Vote tla zat hi 73% a tling a ni.

Iran ram danah president candidate dangte chuan inthlan result-a an lungawi lo a nih chuan result puan aṭanga ni thum chhung Guard Council of Constitution-ah complaint an thehlut thei a ni. Council hi ramchhunga legislative body sang ber a ni a, president thlan result hi a nemngheh a ngai dawn a ni.

Iran ram hotu lu ber, Supreme Leader Ayatollah Ali Khamenei chuan inthlan tluang tak an nei leh, vote a tla ṭha chu lawmawm a tih thu a sawi a, President atana thlan nawn Rouhani pawh a lawmpui thu a sawi. Hemi rua hian president leh a kaihhruai sorkar chu an ramin harsatna a neih mekte chingfel tura theihtawp chhuah turin a chah nghal bawk.