Venezuela-ah ni 50 chhung nawrh huaihawt tawh

Venezuela President Nicolas Maduro leh a kaihhruai sorkar ban phuta nawrh huaihawt chuan Inrinni khan ni 50 a tling a, hemi pual hian ramchhung hmun hrang hrangah kawngzawh a ni.

Eptu pawl thupuangtu, Edinson Ferrer chuan an ram khawpui, Caracas-ah chuan kawngzawh hi mi 160,000 an tling niin a sawi a, mipui pungkhawmte chuan dictator an duh tawh lohinziahna lehkha an keng.

Venezuela mipui tam tak chuan an rama thil man sang chak lutuk te, ei tur leh damdawi lam indaihlohna nasa tak thleng mek leh mihring dikna chanvo palzutna thleng ṭhinah President Maduro-a kaihhruai sorkar chu mawphurtuah an puh a, inthlan ṭhat buatsaih an phut a ni.

Caracas-a kawngzawh hi eptu pawl hruaitu, ṭum hnih president candidate lo ni tawh Henrique Capriles-a’n a ho a, “Ni 50 nawrh huaihawt chhungin sorkar chuan an zinga mi 50 a tihlum tawh a ni. Mahse Venezuela ram tan hian nasa zawkin kan bei zel dawn a ni”, a ti.