Myanmar-ah khuahkhirhna July 31 thleng pawtsei

Hripui leng vanga Myanmar sorkarin an rama khuahkhirhna a siamte chu July 31 thleng atan a pawtsei. Central Committee on Prevention, Control and Treatment on Covid-19 chuan thupek tichhuakin, mipui punkhawm khapna leh zan lam curfew puan chu tun thla chhung atan pawhsei a nih thu a sawi. Mipuite chu social distancing zawm ṭha tur leh, hri leng laka theihtawpa inveng fimkhur turin an chah bawk. 

Khuahkhirhna siam hian UN leh ram dang palai huam tel loin, visa pek chhuah khapna pawh a la huam tel. An rama hri kai hmuhte chu ram dang aṭang haw vek an nih vangin tun thla chhung atan international flight pawh tihtawp chhunzawm a ni dawn a ni. Vice presi­dent Henry Van Thio chuan an ram dinhmun azirin, international flight-te chu October thla velah thlawh tir chhunzawm tum a nih thu a lo sawi tawh a ni. 

Myanmar ramah hian Covid-19 hmuh chhuah tawh hi mi 336 niin an zinga parukin an thihpui tawh a ni. Hri kai zinga 261 chu enkawl dam an ni tawh bawk.