Ukraine President-in ram phatsantua puh security hotu 2 a ban

Ukraine president Volodymyr Zelenskyy chuan an ram security service hotu Ivan Bakanov leh state prosecutor hotu lu ber General Iryna Venediktova-te chu banin, kawng hrang hranga an ram phatsan leh Russia thawhpuiah a puh.

President Zelenksyy chuan, SBU security service leh prosecutor office-a official 60 chuangte chu Russia-in a luah sak bialah Ukraine dodal zawnga hna thawkah a puh a, law enforcement official-te lakah ram phatsantua puhna thubuai 651 zet a awm thu a sawi.

Security service hotu Ivan Bakanov leh Prosecutor General Iryna Venediktova ban an ni leh, official eng emaw zat lakah phatsantua puhna thubuai siam chu Russia nen an indo meknaa dam khawchhuak tura an beihnaah an ram pawt hniamtu lian tak an nih thu Zelenskyy chuan a sawi a ni.

Russia sipaite hian Ukraine khawpui, Kyiv an lak theih loh avangin Ukraine chhim leh khawchhak lamah beihpui hi a thlak chhunzawm a, ram zau tak a la tawh a ni. Zelenskyy chuan an ram beihna atan hian Russia hian cruise missile 3,000 chuang an kap chhuak tawh a, ralthuam dang an hmante chu chhinchhiah sen pawh a ni lo a ni, a ti.

Ukraine General Staff chuan satellite communication channel-te khuahkhirh sak tumin Russia sipaite hian radio-electric warfare an hmang tih nimin khan a sawi bawk.