Sri Lanka President lailawkin state of emergency puang

Sri Lanka President lailawk atana lakluh thar, Ranil Wickremesinghe chuan Pathianni zan khan an ramah state of emergency a puang.

Sorkar thuchhuahah ramchhunga buaina awm mek tihrehna tur leh, economy lama harsatna an tawh mek siamṭha tura hma an lak theihna turin he thupek hi tihchhuah niin a tarlang. "Mipui himna tur te, dan leh thupek kenkawh leh mipuite mamawh hrang hrang buaipuina turin hei hi a ṭul a ni," tiin thuchhuah chuan a tarlang.

President aṭanga bang ta, mipuite nawrh huaihawt vanga ram danga tlanchhia, Gotabaya Rajapaksa chuan an ram economy buaina pumpelh tur hian kawng awm zawng zawng a dap tih a sawi.

Gotabaya Rajapaksa banna thehluh hi Parliament chuan kar liam ta Zirtawpni khan a pawmsak tawh a, Inrinni khan President thar thlanna tur buaipui ṭan turin Parliament member-te pawh an inhmukhawm tawh bawk.

President thar atan hian Rajapaksa thawhpui, Wickremesinghe chu rin kai ber zingah tel mah se, mipuite chuan an duh loh thu an sawi. Hei vang hian Wickremesinghe hi President atana thlan a nih chuan ramchhung buaina hian zual lam a pan zel rin a ni.