Human Rights activist-ten Taliban-te nawr turin ram hruaitute ngen

Human rights leh education activists ṭhahnem takte chuan khawvel ram hruaitute hnenah open letter thawnin, Afghanistan-a zirlai hmeichhiate tan secondary school hawn tir tura Taliban-te nawr turin an ngen.

Nikum August thlaa Taliban-ten Afghanistan-a thuneihna an chan hnuah, hmeichhiate lehkha zir chhunzawm hi an khapsak a ni. Activist-te chuan hmeichhiate hi zirna chhunzawm thei loin ni 300 dawn an awm tawh a, an hmasawn zelna tur pawh rahbeh sak an ni, an ti. Hetianga rahbeh an nih chhunzawm zel chuan an thil tum leh beiseina neihte pawhin a tawrh dawn a ni, tiin an sawi.

Khawvela ram hruaitute leh international organization-te chu Afghan hmeichhiate dikna chawikang tur leh vawnhimsak tura theihtawpa hma la turin an ngen a, a bikin Class 6 chin zirlai hmeichhiate zirna chhunzawm thei loa Taliban sorkarin a khapsakna tur tihtawp tir turin an ngen a ni.

Lehkha thawnah hian Taliban-te chet dan demna thu chhuah siam leh, inpumkhat a ṭul zia tarlan piah lamah a taka chet chhuah a ṭul thu an sawi. Afghanistan educational system tana a rang thei anga ṭanpuina sum pe turin an phut bawk. Inpumkhatna lantir piah lamah Taliban chu thil thlen chhanah mawhphurtua dem tur leh Afghanistan-a educational system sum lama ṭanpuina thawn turin an ngen a ni.