Russia President Putin-a'n Iran a tlawh

Russia president Vladimir Putin chuan Thawhlehni khan Iran a tlawh a,Iran Supreme Leader Ayatollah Ali Khamenei nen an inkawm.

President Putin hi Russia-in Ukraine a run hnua Soviet Union ni ṭhin ram pawn lama a zinchhuahna hmasa ber a ni.

Khawthlang ramte chuan Ukraine a do avangin Russia economy tihchhiat tumin hrekna lian tham tak tak an siam a, hei vang hian Russia pawhin khawthlang ramte hawisanin China, India leh Iran chu inzawmna ṭha zawk neihpui a tum mek. Tun hnaiah Russia official-te chuan central Iran-a airfield chu ṭum hnih an lo tlawh tawh bawk a, White House chuan Ukraine beihna tura Iran drone hman a ṭul thut pawha hman theih a nih dan tur an enfiah niin a sawi.

US president Joe Biden-a'n Middle East ram dang, Saudi Arabia a tlawh aṭanga ni thumah Putin hian Iran khawpui Tehran hi a thleng a ni. Iran supreme leader Khamenei nen hian meeting an neih ṭum ngana a ni. Putin-a foreigin policy adviser Yuri Ushakov chuan, "Khamenei nena inpawhna ṭha neih hi a pawimawh hle," tiin ram pahnihte inlaichinna leh, khawvel huap thil dangah pawh inrintawnna nen inbiakna ṭha tak a hma pawhin an lo nei tawh a ni, a ti. Putin hian Khamenei bakah Iran president Raisi chu nuclear deal chungchangah inbiakna a neihpui bawk ang.

Putin-a'n Iran a tlawh lai vek hian Egypt president Tayyip Edrodang pawh zin vein, hruaitu pahnihte hian Tehran-ah Ukraine-a Black Sea grain thawnchhuah chhunzawm leh dan an sawidun dawn a ni. Russia leh Iran hian khawthlang ramte do zawngin Syria president Bashar al-Assad an thlawp thu an sawi tawh bawk.

Kum 69 mi, Russia President Putin hian Covid hripui leng vangin tun hnai kum hnih chhung chu ram dangah a zin chhuak tam lo hle a, February 24-a Ukraine an run avangin an buai chhunzawm leh bawk a ni. Soviet Union ni ṭhin ram pawm lama a zinchhuah hnuhnung ber chu kumin February thlaa China rama a zin kha a ni.