Sri Lanka President thlan turah candidate pathum awm

Sri Lanka President thlan turah President lailawk Ranil Wickremesinghe leh lawmaker pahnih Dullas Alahapperuma leh Anura Kumara Dissanayake-te chu official candidate-ah puan a ni. Vawiinah President thar hi thlan a ni ang.

Dullas Alahapperuma hi Mahinda Rajapaksa party, Sri Lanka Pdoujana Peramuna (SLPP) member niin, information minister for mass media a ni ṭhin. Tun ṭum inthlanah hian independent-in a ding ang.

Anura Kumara Dissanayake hi eptu party tenau zinga mi Janatha Vimukthi Peramuna (JVP) member niin, tunhnaia sorkar duh lohna lantira nawrh hauihawt thlawptu zinga mi a ni.

President lailawk Ranil Wickremesinghe hi ṭum ruk prime minister a ni tawh a, rorellai SLPP presidential candidate a ni.

SLPP hian seat 225 awmna, Parliament-ah hian seat 100 chuang a nei mek a, mahse an member ṭhenkhat chu party aṭang hian inlahrangin independent angin an ṭhu a ni. SJP chu member ngah ber dawt niin seat 50 an nei a, member 10 nei Tamil National Alliance (TNA) nen an thlawp tur lam an la sawi lo. JVP hian seat thum an nei ve bawk.

Eptu hruaitu leh Samagi Jana Balawegaya (SJB) candidate Sajith Premadasa chu a inhnukdawk leh nghal a, Alahapperuma hi a thlawp zawk dawn tih a sawi. "Kan ram leh mipuite tana a ṭhat zawkna turin, President candidate aṭangin ka inhnukdawk a, eptu lama kan thawhpui Dullas a tlin theihna turin theihtawp kan chhuah ang," tiin a sawi.

President thlanna neih tura candidate pathumte hi nimin khan Sri Lanka Parliament chuan a pawm a ni. Vawiinah Parliament-ah secret ballot hmangin President thar tur hi thlan a ni dawn a, result pawh puan nghal a ni ang.