France leh UAE-in energy lama thawhdunna ziak

France leh United Arab Emirates (UAE) sorkar chuan Thawhṭanni khan energy sector lam tihhmasawnna tura thawhdunna tur inremna an ziak.

France president Emmanuel Macron leh UAE hruaitu Sheikh Mohamed bin Zayed al-Nhayan-ten Paris-ah inbiakna an neih hnuah, inremnaah hydrogen, renewable leh nuclear energy sector danga ram pahnihte thawhdunna tur hi ziah a ni tih France sorkar thuchhuah chuan a tarlang. "Energy dinhmun inthlak reng karah, he inremna hian hun rei zawk daih tur thawhdunna nghet tak leh, industrial contract tan kawng thar a sial thei dawn a ni," tiin a sawi.

UAE president Sheikh Mohammed bin Zayed al-Nahyan chuan Pathianni khan France khawpui, Paris hi thlengin nimin thleng khan a cham. May thlaa a unaupa hnen aṭanga thuneihna a lakchhawn hnua ram dang a tlawh hmasak ber a ni.

Khawthlang ramte hian Russia aṭanga oil an lakluh ṭhinte thlakna tur an zawng mek a, hei vang hian UAE pawh hi khawthlang ramte tan a pawimawh chho hle. Sheikh Mohamed chuan UAE chuan khawvel puma energy security awmna turin puih a inhuam tih a sawi a, a bikin France ram chu thawhpui an inpeih thu a sawi.