NKorea-in ballistic missile enchhin leh

North Korea chuan Pathianni khan medium-range ballistic missile thar chu hlawhtling takin a enchhin tih a sawi.

NKorea chuan missile a enchhin hi Pukguksong-2 a nih thu a sawi a, sipaite hman tura pekchhuah theih a nih tawh thu a sawi bawk. Missile hi South Pyongan province-a Pukchang aṭangin kahchhuah a ni a, an ram hotu lu ber, Kim Jong-un pawhin a enpui nia sawi a ni.

US chuan Pathianni-a NKorea-in missile a enchhin hi a hmaa alo enchhin tawh pathum te aiin a kah theih chin a tawi zawk niin a sawi. Missile kahchhuah hnuhnun ber hi km 560 vel a thlawh hnuah Sea of Japan lamah a tla niin, South Korea Joint Chiefs of Staff chua a sawi. Kar hmasaa missile a enchhin khan km 700 a kap pha a ni.

Japan news agency-te chuan NKorea missile kahchhuah thar ber hi Japan tuipui huam chinah a tla lo niin an sawi. Japan Chief Cabinet Secretary Yoshihide Suga chuan NKorea sorkar hnenah an lungawi lohna thu an thlen nghal tih a sawi.

Pathianni-a NKorea-in missile a enchhin hi kumina a ṭum 10-na a ni tawh a, United Nations-in ballistic missile leh nuclear test a khapsak chungin a enchhin lui zel a ni. UN resolution palzuta NKorea-in missile a enchhin luih leh avangin US, Japan leh South Korea-te chuan nimin khan UN Securiy Council urgent meeting koh a, NKorea chungchang ngaihtuah ho an rawt nghal a ni.