Philippines President-in vantlang hmuna meizuk a khap

Philippines President Rodrigo Duterte chuan ruihhlo zuar leh hmangsualte laka beihpui a thlak hnuah, vantlang hmuna meizuk khapna a kalpui leh dawn.

President Duterte chuan school, gas station, hospital leh ei siamna bial chhungah mei zuk khapna dan a tichhuak tawh a, vantlang hmuna mei zu te chu dan bawhchhia, thla li thleng lung-in tantir theih an nih thu a sawi. Hei bakah hian dollar 100 chawitir theih an ni bawk.

Philippines ram mipui hmun thuma ṭhena hmun khat, mi maktaduai 17 chuan mei an zu a, President thupek siam thar hi kenkawh a harsat hle rin a ni. Mahse vaihlo do pawlte chuan President hmalakna hi lawmawm an tih thu an sawi.

Health Secretary Paulyn Jean Rosell-Ubial-i chuan khapna thupek siam vang hian mi tam takin mei an nghei phah a beisei thu a sawi a, kum 2010 leh 2015 inkar khan an ram mipui maktaduai khat chuang chuan mei an nghei niin a sawi. Kum 2020-ah chuan hei aia tam zawk hian an nghei theih a beisei thu a sawi bawk.