Sri Lanka President atan Ranil Wickremesinghe thlang

Sri Lanka President thar atan prime minister Ranil Wickremesinghe chu nimin khan thlan tlin a ni.

Gotabaya Rajapaksa-an an ram chhuahsana banna a thehluh hnuah Wickeremesinghe hi president lailawk a ni mek bawk.

Wickremesinghe hi Sri Lanka prime minister vawi ruk lo ni tawh leh, member 225 awmna Parliament-a bloc lianber SLPP thlawpna a dawn avangin inthlan hma pawh hian tling tura rinkai ber a ni sa a ni.

Kum 73 mi, Wickremesinghe hi sorkar laka lungawi lohna lantir mek mipuite chuan a hma aṭangin President atan hian an duh loh thu an sawi sa a ni. President bang ta, Rajapaksa thawhpui hnai tak a nih vangin prime minister anihna aṭanga bang turin an phut bawk.

President lailawk atana lakluh a nih hnuah an ramah state of emergency puan chu pawtseiin, police leh security force chungah thuneihna zau tak a pek belh bawk. He thupek hi lungawi lohna lantirtute'n President official residence an luhkhung hnuah a puang a ni.

Nimina President thlannaah hian candidate pathum an awm a, Wickremesinghe bakah SLPP dodaltu leh education minister hlui Dullas Alahapperuma leh leftist People's Liberation Front hruaitu kum 53 mi, Anura Dissanayake te an ni.

Ranil Wickremesinghe hian vote 134 hmuin, Alahapperuma hian vote 82 a hmu a ni. President atan thlan tlin a nih hnuah, Wickremesinghe chuan politics lam an khingpuite pawh an ram dinhmun siamṭhatna turin a kaihhruai sorkar chu thawhpui turin a ngen nghal.

Singapore-in an ram chhuahsan turin Rajapaksa a ti
Singapore chuan Sri Lanka president hlui Gotabaya Rajapaksa chu an ram chhuahsan turin a ti.

Singapore thuneitute chuan Sri Lanka President hlui hi ni 15 chhung an rama awm phalna an pek chu bawhchhe lo tur leh, hemi chin bak hi awm lo turin an ti a ni.

Sri Lanka mipuite duh lohna lantira bang tura phuta hun rei tak nawrh an huaihawt hnuah, Rajapaksa hian July 13 khan an ram hi chhuahsanin Maldive ramah a tlanchhia a, a tukah Singapore hi a pan leh nghal a ni. Singapore aṭang hian President a nihna aṭanga banna hi email hmangin Parliament Speaker hnenah a thawn a ni.