UK PM kalchhuak tur Boris Johnson-a'n fiahna a paltlang

UK prime minister kalchhuak tur, Boris Johnson thlaktu tur zawnga campaign ngawrh tak an kalpui mek karah, Thawhṭanni tlaia eptute'n sorkar rintawk lohna, 'no-confidence' motion an put luh chu Johsnon hian a paltlang.

Sorkar fiahnaah Johnson hian vote 111-in hnehna a chang a ni. Amah thlawp lamah mi 349 leh duh lo lamah 238-ten an vote a ni. Fiahna a paltlang leh tak vangin Johnson thlaktu tur thlan a nih hnuah pawh Conservative Party hian sorkarna an chelh chhunzawm zel ang.

Rorellai, Conserva­tive-in hnehna an chan avangin eptu pawl, Labour party chuan inthlanpui buatsaih turin an nawr zui thei rih dawn lo a ni. Thla 12 hnuah no confidence vote hi lak a ni leh thei dawn chauh a ni.

Boris Johnson hian a miniter leh senior official tam tham takin banna an thehluh hnuah, Prime Minister a nihna aṭanga a ban tur thu hi a puang ve a ni. Conservative party hotu aṭanga a inhnuhdawh tur thu sawi mah se, amah thlaktu an thlan hma zawng chu PM hna hi a la chelh chhunzawm tur thu a sawi.