UK-ah khaw lum vangin national emergency puang ; Europe-ah kangmei a chhuah chhunzawm zel

United Kingdom chuan khawlum lutuk vanga red extreme heat warning a tihchhuah hnu rei lo teah an rama a vawi khatna atan khaw lum vangin national emergency a puang. UK hi Europe ram zinga boruak lum, heatwave tuar ram zinga mi niin, France, Italy, Spain, Portugal leh Greece-te pawhin harsatna lian tak an hmachhawn mek.

Britain-a weather forecaster, Met Office tarlan danin, July 18 leh 19, 2022 khan a vawi khatnan weather emergency warning chu tichhuakin, boruak lum lam hian 41 degrees Celsius (°C)-te hawlh chhoin , chhinchhiah theih china an rama khaw lum ber ṭum an tawng a ni.

"Red Extreme heat national severe weather warning hian central, hmar lam, khawchhak lam leh chhimchhak lam a huam a ni," tiin Met office chuan a sawi.

Portugal leh Spain-a kar khar chhung vel boruak lum lutuk vanga thi chu mi 1,000 chuang an awm tawh nia sawi a ni bawk.

Spain-a ram kang ṭhelhtute chuan province pakhat, Salamanca-a sava vang chi te awmna Monfragüe national park-a kangmei nasa tak a chhuah avangin he khaw venhim tumin theihtawp an chhuah mek. Ram kang ṭhelhna atan hian helicopter hman a ni a, mahse khaw lum lamin 40°C a pel a, tlang chhengchhe tak takte a nih avangin kangṭhelhtute tan pawh a hautak hle.

Portugal Health Ministry chuan khaw lum vangin mi 650 chuang an thi tawh tih sawiin, thi zinga a tam zawkte chu kum upa lam an ni.

France chhim thlang lamah ram kang vangin mi 16,000 chuang sawnchhuah an ni tawh. Tourist region lar tak, Gironde-a campsite-a guard-te pawh hruaichhuah an ni tawh. He hmun tlawhtu khualzinte chu kar tir khan hruaichhuah an lo ni tawh bawk.

Italy ramah pawh khaw lum nasa tak an tawng mek. Italy cabinet chuan December 31 thleng region pangaah state of emergency puan alo remti tawh a ni.

World Meteorological Organization chuan Portugal, Spain leh France-a boruak lum, heatwave leh ram kang, wildfire-te chuan zual lam an pan zel dawn thu leh Europe hmun dangah pawh darh thei a nih thu an sawi.