SKorea president hlui Park-i thubuai ngaihtuah ṭan

South Korea president aṭanga ban tak, Park Guen-hye-i thubuai chu nimin khan ngaihtuah ṭan a ni.

President hlui hi thamna la, thuneihna dik lo taka hmang leh sorkar thuruk tiputchhuakah puhin thubuai siamsak a ni. Kumin March thla khan man a ni.

South Korea ramah hian eiruk thu­buaia thiam loh chantirte chu dam­chhung lungin tantir theih an ni.

Park-i hi sorkara nihna pawimawh chelh lo, a ṭhianṭha Choi Soon-sil chu sorkar policy siamna kawnga inrawlhtir leh, thuruk hrilhah puh a ni a, sorkar lam aṭanga duhsakna an dawn theih nan South Korea-a company lian ṭhenkhat hnen aṭanga thamna sum la-ah puh a ni bawk. Thamna petu zingah hian Samsung pawh a tel. Choi-i pawh hi thubuai siamsak a ni bawk.

President hlui hi thubuai 18 siamsak a ni a, a laka charge sheet thehluh pawh hi phek 120,000 zeta chhah a ni.

Park-i hian president a nih laiin a ṭhian, Choi Soon-sil-i enkawl foundation tan company-te chu pawisa thawh turin a nawr nia puh a ni a, hetianga pawisa pete chu sorkar lam aṭangin duhsakna pawh pek an ni bawk. Hei bakah hian president a nih anga a thusawi turte chu Choi-in a endik sak thin a, Choi-i chhawr ṭangkai theih tur sorkar thuruk te pawh a hrilh nia puh a ni bawk. Park-i hian a kaihhruai sorkar sawiseltu chu sorkar aṭanga duhsakna dawng thei lo turin blacklist pawh a siam bawk a ni.

Mahse tubuai ngaihtuahnaah hian Park-i ukil-te chuan Park-i hian ama tana ṭangkaina tur nei lo tana sum thawh tura company-te a nawr luihna chhan tur a awm lo tih an sawi.