Philippines President-in martial law puang

Philippines President Rodrigo Duterte chuan an ram chhim lam, Mindanao-a sorkar sipai leh Muslim helho nasa taka an inbeih hnuah sipai hnena thuneihna sangawk pekna dan, martial law hman a nih thu a puang.

President thupuangtu Ernesto Abella chuan, martial law hi Thawhlehni-a puan a nih aṭang khan hman ṭan nghal a nih thu leh, ni 60 chhung hman a nih tur thu a sawi. President Duterte hi Russia ramah ni li cham turin a zin mek a, a zinna ram aṭang hian martial law hi a puang a ni.

Mindanao thliarkara buaina thleng vang hian Duterte chuan Russia rama a cham hun tur pawh a tihtawi phah a, vawiin nia Russia President Vladimir Putin-a nena meeting neih tura ruahman tawh pawh siam danglamin, Thawhlehni zan khan hruaitu pahnihte hi an inkawm a ni.

President Duterte chuan martial law chu khauh taka kenkawh a ni dawn ti sawiin, a tul a nih chuan kum khat chhung pawh hman a nih tur thu a sawi. Hemi rual hian buaina chu thla khat chhunga chinfel theih a nih chuan lawmawm a tih tur thu a sawi bawk.

Philippines khawpui, Manila chhim lam km 816-a hlaa awm, Manila-ah hian Thawhlehni khan inbeihna nasa tak a thlenga, sipai pahnih leh police officer pakhat an thi a, sipai 12 in hliam an tuar bawk. Pawikhawihtute hian Catholic biakin, city jail, school pahnih an hal bakah khawpui kawngpui pawimawh pahnihte an luah zui a ni.

Sipai beitute hi Islamic State firfiak pawl nena inzawmna nei, Abu Sayyaf leh Maute pawl mite nia hriat a ni. Sipaite hian firfiak ho meeting neihna hmun nia sawi apartment an dap hnuah buaina hi a chhuak zui a ni.

Sipai hotu General Eduardo Ano chuan an la inbeih chhunzawm reng avangin mipuite chu pawn chhuak lo turin a ngen. Inchhunga awm a, an kawngka leh tukverhte pawh kalh vek turin a ngen a, sipai ṭhahnem tham tak tirh an nih thu a sawi.