Manchester beihnaa inhnamhnawiha rin mi 7 man tawh
Manchester Arena-a bomb puak vanga mi 22 thihna thlennaa inhnamhnawiha rinhlelh mi pakhat chu Nilaini zan khan man a ni leh a, police-ten rinhlelh an man hi mi pasarih an tling tawh.
Nilaini zana police-ten an man hi Nuneaton, Warwickshire a mi a ni a, a hming leh nihna erawh puanzar a ni lo.
Britain police hotute chuan Manchester bomb a nih chungchangah an thil chhui mekna thil ṭhenkhat US media ten an lo tiput ru chu pawi an tih thu an sawi. National Police Chiefs’ Council chuan an thil chhui lai lo tihput ruk hian hna thawhna zel tur pawh a nghawng niin a sawi. US media-ten investigation kal lai an lo tih put ruk chungchang hi Prime Minister Theresa May-i chuan Brussel-a NATO Summit neihnaa US President Donald Trump a hmuh hunah sawichhuah ngei a tum a ni.
US media-ten information an tihput ruk zingah hian Manchester Arena-a thihchilh bomb tipuaktu, Salman Abedi chu a chhungten a hlauhawm tih security official te pawh an lo hriattir tawh nia sawi a ni. Hei bakah hian a chhungte hian pawi a khawih an hlauhthawn avangin Libya ramah hruaiin a passport pawh a chhuhsak a, mahse Mecca-ah zin a duh chhuanlamin Manchester-ah hian a kir leh nia report a ni bawk.