China aiin India-ah mihring tam zawk : Researcher

University of Wisconsin-Madison-a resear­cher Yi Fuxian chuan khaw­vela mihring tamna ber ram chu China ni loin India a nih thu a sawi.

South China Morning Post-in a tarlan danin, Yi hian China-in an ram mipui zat a tarlan, tlukleh­dingawn 1.38 nia a tarlan chu a dik lo a, a dik takah an chhut zat ai hian maktaduai 90 in a tlem zawk a ni, a ti. A tlem zawkna zat nia a sawi pawh hian Germany leh Belgium ram mipuite belhkhawm zat a la tling a ni.

Yi Fuxian chuan kum 1991-2016 inkar chhung­a official-ten China rama nau piang thar zat maktaduai 464.8 nia an chhinchhiah chu a dik lo a, a dik takah chuan hemi hun chhunga nau piang thar zat chu maktaduai 377.6 chauh a ni, a ti. Hei vang hian China rama mihring awm zat dik tak chu tluklehdingawn 1.29 a ni a, India rama mihring cheng zat tluklehdingawn 1.32 aiin a hniam zawk daih tawh niin Yi chuan a tarlang.

Yi-a thil chhut hi a dik a nih chuan, United Nations-in kum 2022-a India ram mipui awm zatin China a lehpel thei dawn chauh nia a lo chhutna chu a dik lo tihna a ni dawn a, hei bakah hian China mihring kiam chak lutuk chungchang hi mipuite hriatah thuneituten an thup nia ngaih a ni bawk ang.