Sri Lanka President thar Ranil Wickremesinghe lalut

Sri Lanka President pariatna atan Ranil Wickremesinghe chu nimin khan an ram khawpui Colombo-a Parliament-ah lakluh a ni.

Parliamentary complex-a Parliament speaker ruala guard of honour pek a nih hnuin, Wickremesinghe hi Parliament-ah chief justice chuan rinawmna thu tiam tirin a lalut a ni. Lakluh inkhawmah hian president hlui pahnih - Mahinda Rajapaksa leh Maithripala Sirisena-te pawh an tel.

Wickremesinghe hian an ram economy tlakchhiat vanga hun rei tak mipuiin lungawi lohna an lantir hnua an ram tlanchhuahsantu, Gotabaya Rajapaksa a thlak a ni. Rajapaksa hian Maldives-a pan hnuah Singapore lamah a kal leh a, Singapore aṭang hian July 14 khan a banna hi Parliament Speaker a thawn.

Nilaini khan Sri Lanka Parlia­ment member-te chuan Wickre­mesinghe hi President thar atan an thlang a ni. Kum 2020 August thlaa Parliament inthlana hnehna a chan zawh loh hnuah an ram hruai hna a chelh leh dawn ta a ni.

Kum 45 zet Parliament mem­ber ni tawhin, prime minister, cabinet minister, chief whip leh eptu hruaitu dinhmun pawh a lo chelh tawh. Prime Minister a nihna a chawlhsan hnuah a cabinet pawh ṭhiah nghal a ni a, hei vang hian prime minister leh cabinet member turte pawh a ruat fel thuai rin a ni.

Speaker hlui, Wickremesin­ghe-a deputy ni ṭhin Karu Jayasu­riya chuan an tum hmasak ber chu an ram siamṭhat a nih thu a sawi.