WHO-in Monkeypox chungchanga khuahkhirhna siam ngaite ngaihtuah ṭan

World Health Organization (WHO) chuan nimin khan mon­key­pox expert committee chu ko khawmin, monkeypox hri leng mek chungchangah inrinlawkna an puan theih sang ber global health emergency puan a ngai em tih an ngaihtuah.

Monkeypox vanga WHO emergency committee vawi hnihnaah hian hri lengin chhiatlam a pan dan te, ram 70 chuanga hri kai 14,000 dawn an awm mek chungchangte an thlirho bawk.

May thla tir aṭang khan hun rei tak chhung he hri hi endemic a nihna hmun, khawthlang ram leh Central Africa ramah te hian a pung chho a ni.

June 23 khan WHO-a mithiam rual hoin emergency commi­ttee a nei a, monkeypox chu Public Health Emergency of Interna­tional Concern (PHEIC)-ah dah a ngai em tih an ngaihtuah. Mahse member tam zawk chuan WHO hotu Tedros Adhanom Ghebreyesus hnenah tun dinhmunah chutianga hma lak ngaihna a la awm lo tih an hrilh. Mahse hemi hnu hian hri kai hi an pun tak zel avang leh, kar liam ta chhung khan hri la len lohna ram parukah hri hi hmuh thar a nih leh tak avangin nimin khan meeting hi an nei leh a ni.

WHO-a technical lead for monkeypox, Rosamund Lewis chuan hri kai report an dawn aṭanga 98%-te chu an mipat pui nena inpawl an nih thu sawiin, heng zinga a tam zawkte chu an hmelhriat loh leh kawppui nei thar te an ni, tiin press conference-ah a sawi. Hri kai tam zawkte hi khawpui area-a kum naupang lam an nih thu WHO chuan a tarlang bawk.

Hri kai hmuhchhuah tamna ram te chu Spain (2,835), Germany (1,924), France (912), the Netherlands (656) leh Portugal (515)-te an ni. Danish company Bavarian Nordic chu monkeypox vaccine siam thei tura phalna nei awmchhun an ni mek a, hei vang hian supply lamah pawh indaih lohna lian tak a awm mek a ni.

US-a hri kai tamna (epicenter) hri kai mi 460 awmna New York-ah Pathianni thleng khan vaccine la tura inziak lut emaw la tawh emaw chu mi 21,500 awm tawhin, mipa kum 20-40 inkarte chu an tam ber.

US assistant secretary of state for global public affairs Loyce Pace chuan khawvelin Covid-19 leh hri leng dang avanga buaina an tawh lai meka monkeypox lo hmachhawn leh chu thil harsa tak a nih thu a sawi. "A hlauhawm thei tih ka hria a, dik taka sawi chuan a hahthlak a ni," tiin Geneva-a US mission-ah a sawi.