UK PM ni turin Rishi Sunak leh Liz Truss-te inbitum dawn

Britain finance minister hlui Rishi Sunak leh foreign secretary Liz Truss-te chu prime minister Boris Johnson thlaktu tur thlannaah an inbitum dawn ta.

Covid-19 hripui len laia kaihhruaina dan a bawhchhiat avang leh hmingchhiatna tam tak a neih avangin a legislator-te'n an thlawp tawh loh avangin Boris Johnson hian tun thla tir lam khan PM a nihna aṭanga a ban tur thu hi a puang a ni. Mahse amah thlaktu tur thlan fel a nih hma chuan PM dinhmun hi a la chelh ang.

Conservative party hruaitu, PM thlaktu tur thlanna turah hian a tirah chuan candidate 11 an awm a, party legislator-ten Nilainia candidate zinga an duh an thlan tawpna an neihnaah, Sunak hian vote 137 hmuin, Truss hian vote 113 a hmu a ni. Candidate vote hmu sang pahnihte aṭang hian PM thlaktu tur hi an an thlang chhuak leh dawn a ni.

September 5-ah PM thlaktu tur thlanna result hi puan a ni ang. Prime Minister thar hian kum tam tak chhunga Britain-in economy lama harsa tak a tawh lai mek chu a kaihruai chhunzawm dawn a, hei bakah hian thil man sang zel leh ram hmasawnna muang tak chu a buaipui zui nghal a ngai dawn bawk.

Final candidate pahnih zingah a tu zawk zawk pawh hi chak se, Britain chuan mi ngo ni lo prime minister hmasa ber emaw, hmeichhe PM pathumna emaw chu a nei dawn ta a ni.