Philippines-ah firfiak leh sipaite inbei chhunzawm zel

Philippines rama Marawi City-ah Maute Group firfiak leh sipaite chu an la inbei chhunzawm zel a, sipai paruk leh firfiak 13 an thi tawh.

Sipai leh firfiakte hi ni thum chhung an inbei tawh a, inbeihna thleng vang hian Marawi-a cheng mi tam tak chu himna zawngin an tlanchhe tawh a ni.

Marawi hi an ram khawpui, Manila aṭanga km 800 vela hlaa awm a ni. He khuaah hian firfiak 40 vel an biru nia hriat a ni a, heng mite dapchhuak tur hian sipaite hian surgical air strike an nei tih sipai thupuangtu, Lieutenant-Colonel Jo-ar Herrera chuan a sawi.

Herrera chuan khawchhunga cheng mi tam tak an tlanchhiat tawh thu a sawi a, a la awmte pawh bomb thlak leh inkah chhunzawm reng a la nih avangin tlanchhe tura hriattir an ni tih a sawi.

Thawhlehni-a sipaiten IS firfiak pawl nena inzawmna nei, Abu Sayyaf group commander, Isnilon Hapilon-a bihrukna dapchhuah tum an beihaṭangin buaina hi a chhuak zui a ni. Abu Sayyaf hian an thurualpui, firfiak pawl dang Maute Group te chu pui tura sawmin firfiak tam takin Marawi khua hi an lut a ni.

Firfiakte hian Catholic biak-in, city jail leh school pahnih an hal a, kawngpui pawimawh leh Marawi pawhtu lei pahnihte an luah zui bawk. Firfiakte hian Catholic puithiam leh biak-ina inkhawm ṭhenkhat chu manin, sipaite beihna laka inphenna atan an hmang nia sawi a ni bawk.

Marawi mayor Majul Gandamra chuan inbeih chhunzawm reng a la nih avangin khaw chhunga sumdawnna hmunte chu khar a ni a, mamawh lamkhawm pawh a harsa hle niin a sawi. Khawchhung mipuiten ei tur, tui in tur leh an mamawh zualpuite an neih theih nan hian thuneitute chuan theihtawp an chhuah tih a sawi.