Syria-a US beihpui thlaknaah civil mi 35 an thi
Syrian Observatory for Human Rights (SOHR) chuan US kaihhruai ṭangrual ramten Ningania Syria khawchhak lama beihpui an thlaknaah civil mi 35 an thi niin a sawi.
US kaihhruai hian Deir al-Zour province-a Islamic State (IS) thununna hnuaia awm, Mayadeen bial chhunga mi chu beih a ni, ṭangrual ramte hian civil mite chenna in eng emaw zat an fuh tel niin SOHR huan a tarlang. Thi zingah hian hmeichhia leh naupang eng emaw zat an tel.
Hemi hma hian ṭangrual ramte hian Raqqa khaw hmarlam an lo bei tawh bawk a, civil mi 16 an thi niin monitor group chuan a sawi bawk. Raqqa leh Deir al-Zour hi firfiakte kuta a awm avangin ṭangrual ramte chuan beihpui an thlak fo a, IS nena inbei Kurdish kaihhruai Syrian Democratic Forces (SDF) te an pui ṭhin a ni.
April 23 - May 23 inkarah ṭangrual ramten beihpui an thlak avangin civil mi 225 an thi tel nia sawi a ni a, hei hi kum 2014, September 23-a ṭangrual ramten Syria an bomb hnua thla khat chhunga civil mi thihna thlen tam ber ṭum a ni.