Philippine-ah firfiakten civil mi 19 that

Pihlippine chhim lama Mindanao thliarkarah security force leh firfiakte an la inbei chhunzawm zel a, kar khat dawn inbei tawhin thi zat hi mi 85 an tling tawh. Pathianni khan firfiakte kutah civil mi 19 an thih belh leh niin sipaite chuan an sawi.

Firfiakte leh sipaite inbeihna avang hian President Rodrigo Duterte chuan kar kalta Thawhlehni khan an ram chhim lam bialah martial law a lo puang tawh a ni.

Islamic State (IS) firfiak pawl nena inzawmna nei, Maute leh Abu Sayyaf firfiak pawlte dapchhuah tumin sipaite chuan beihpui an thlak chhunzawm zel a ni.

Thuneitute chuan Muslim tamna khua, Marawi-a inbeihnaah hian firfiakte hian civil mi 19 an that leh niin an sawi. Marawi khuaah hian mi nuai hnih vel an cheng a ni. Thi zingah hian hmeichhe pathum leh naupang pakhat an tel.

Sipaiten Philippine-a IS pawl hruaitu nia sawi, Isnilon Hapilon man tuma an zawn avangin buaina hi a chhuak ṭan a ni. Firfiakte hian security force-te’n Hapilon man an tum avang hian Marawi khua hi an bei zui a, IS flag-te tarin Kristian puitiham pakhat leh midang 14-te chu biak-in aṭangin an man a, building eng emaw zat an hal bawk. Marawi khuaa inbeihnaah hian sipai 13, police pahnih leh firfiak 51 an thi tawh a ni.

Inbeihna thleng vang hian Marawi-a cheng mi tam tak chu himna zawngin an tlanchhe tawh a, security force-te pawhin civil mite chu inthiarfihlim turin an hrilh a, firfiak ho tawmna hmun nia hriatte chu an bomb chhunzawm zel a ni.

Security force-te nena inbei, Abu Sayyaf hi Philippines chhim lama IS firfiak pawl zawmpui an ni a, an bial chhunga Islamic state hran siama inlakhran duhtu an ni. Lawng suam, ramdangmi rukbo leh thah bakah tualchhung mite sum an chhuh luih sak fo ṭhin. Maute pawl hi ruihhloa sumdawnna lama pawh inhnamhnawiha hriat an ni a, nikum khan US embassy chu bomb an lo tum tawh bawk a ni.