NKorea-in ballistic missile enchhin

North Korea chuan nimin khan ballistic missile a enchhin leh a, hei hi kumina a enchhin vawi 12-na a ni.

US military monitor chuan NKorea missile kahchhuah hi short-range missile, Scud type niin minute ruk vel a thlawk niin a sawi. Japan pawhin NKorea missile hi an ram tuipuia Exclusive Economic Zone (EEZ)-ah a tla niin a sawi bawk. US Pacific Command pawhin short range missile, Scud ballistic missile hi Wonsan aṭanga kahchhuah a ni a, km 450 vela thui a thlawk a, Korean peninsula leh Japan inkara Sea of Japan (East Sea)-ah a tla tih a sawi.

Scud missile hi km 300-500 chin kap thei a ni a, North Korea hian South Korea ram beihna atan a hmang thei dawn a ni. South Korea Joint Chiefs of Staff (JCS) chuan SKorea leh US-te’n missile kahchhuah chanchin hi an zirchiang nghal tih a sawi.

Japan Prime Minister Shinzo Abe chuan NKorea-in missile a enchhin leh chu a dem thu a sawi a, ram dangten vawi tam tak titawh lo tura an vau chunga a enchhin luih zel avangin kan ngaizam mai mai tawh dawn lo, a ti. Kar hmasaa G7 summit neihah pawh khan North Korea chungchang chu an buaipui ber pakhat a nih thu sawiin, Abe chuan US nen North Korea chungah hian action na taka an lak tur thu a sawi.

North Korea hian Soviet Union hunlaia siam, short range Scud missile hi eng emaw zat ala nei nia sawi a ni a, heng missile-te hi siam danglam chuan km 1,000 chin a kap pha a ni.