Sri Lanka-a tuilianah mi 150 chuang an thi

Sir Lanka rama ruahsur nasa avanga tuilianah Pathianni thleng kha mi 150 chuang an thi tawh a, mi nuai nga velin harsatna an tawk mek.

Ruahsur nasa avang hian tui a len bakah hmun tam takah chirh a tawlh nasa hle bawk a, harsatna tawkte chhanchhuah hna thawh mek a ni. Batticaloa, Colombo, Galle, Gampaha, Hambantota, Kalutara, Kandy, Kegalle, Matale, Matara, Mulaitivu, Ratnapura, Trincomalee leh Vavuniya-te chuan tuilian leh leimin an tuar a, a tuar nasa ber chu chhim lama Galle district an ni.

Disaster Management Centre chuan tuilian hi district 15-a chhungkaw 1,14,124-te’n an tuar niin a sawi a, mi 151 chuang an thi tawh a, chin hriat lohin mi 111 an awm mek a ni,a ti.

Sri Lanka-ah hian kar kalta Ningani aṭang khan nasa takin ruah a sur a, khawchin zirtute chuan ruah hi ala sur chhunzawm zel dawn niin an sawi.

Sri Lanka ṭanpui tur hian India chuan Navy lawnglian pathum a tir a, Pathianni khan lawng pakhat chuan Sri Lanka hi a thleng tawh a ni. Heng lawngah hian buhfai, chhangphut, chini, bedsheet, blanket, rain coat, bawnghnute, biscuit leh thildangte phurh a ni. China pawhin tuilian tuarte chhawmdawlna atan hian UD dollar matkaduai 2.2 hu a pe tawh bawk. China President Xi Jinping leh Premier Le Keqiang-te chuan Sri Lanka President Sirisena leh Prime Minister Wickremesinghe-te hnenah an tawrhpui thu an hrilh tawh a ni. Ram dangte pawhin chhanchhuah hna thawhna leh tuilian tuarte chhawmdawl hna thawhnaah a ṭul anga puih an inhuam thu an sawi.

Tuilian hian chenna in 412 a len chhe tawh a, in 4,200 chu chenzui tlak lohin an awm bawk. Mi 471,000 vel chu chenna nei loin an awm mek a, sorkar chuan tuilian tuarte awm lailawkna tur hi hmun 330 chuang a siam a ni.

Kum 2003 khan Sri Lanka-ah hian tuilian nasa tak avangin mi 250 an thi a, chenna in 10,000 chuang alo chhe tawh bawk a ni.