Bangladesh-ah cylcone Mora a tleh

Bangladesh ram chu nimin khan cyclone Mora-in a nuai a, ruah nasa tak a sur tel avangin tui a lian bawk.

Nimin zing dar 6 aṭang khan thlipui hi tuipui kama Cox’s Bazar distrirct leh Chittagong a thleng niin, Bangladesh Meteorological Department chuan a sawi. Thlipui hi darkar khata km 117-a nain a tleh a, ruahsur nasa avanga tuilian leh leiminah mi 180 vel an thi. Tuipui kam district-a hmun eng emaw zat chu tuilian hian a chim a ni.

Thuneitute chuan thlipui tleh hma hian mi tam tak chu hmun him lamah an sawnchhuak a, school leh sorkar office hrang hrangah awmtir an ni. Sangha mantute pawh tuipui lamah chhuak lo tura hriattir an ni bawk. Disaster managment authority thupuangtu Abul Hashim chuan thlipui tleh tur avang hian mi 300,000 vel chu hmun him lamah sawnchhuah an nih thu a sawi.

Bangladesh hi April leh December thla inkarah thlipuiin a nuai fo a, chhiatna nasa tak a thleng chamchi a ni. Nikum May thla khan an ram chhim lam chu cyclone Roanu-in a nuai a, mi 20 an thi a, mi nuai nga chuang hmun him lamah an tlanchhia a ni.