Kim Jong-nam thah thubuai Malaysia High Court-ah sawn
Malaysia, Kuala Lumpur airport-a North Korea ram hotu Kim Jong-un-a unaupa, Kim Jong-nam thattua puh hmeichhe pahnihte thubuai chu Malaysia High Court-ah sawn a ni.
Kim Jong-nam thattua puh hmeichhe pahnihte hi Indonesia mi Siti Aishah (25) leh Vietnam mi Doan Thi Huong (28)-te an ni a, thiam loh chantir an nih chuan thi tura hremna thlenga pek theih an ni ang.
Hmeichhe pahnihte hi Kim-a hmaiah tur hlauhawm tak VX nerve agent tataxh puh an ni a, he hi Kim hian a thihpui a ni. Aishah leh Huong-te hian he tualthahnaa hian midangin hmanruaah an hmang niin an sawi a, an tirh lai pawhin infiamna angah an ngaih thu an sawi. Hetih lai hian Malaysia thuneitute chuan he tualthahna thlengah hian North Korea sorkar a inrawlh a ringhlel thung.
Aishah leh Huong-te hi March 1 khan Sepang district magistrate court-ah thubuai siamsak a ni a, court hian prosecutor-te’n court sang zawka ngaihtuah tura an ngenna chu
ṭum hnih lo hnawlsak tawh a ni. Mahse nimin khan district court judge chuan thubuai hi a sawn ta a ni.
NKorea ram hotu hlui, Kim Jong-Il-a fapa upa ber Kim Jong-nam hian NKorea ram inrelbawl dan hi ualau takin a sawisel fo a, hei hi Kim Jong-un leh a kaihhruai sorkar hian an ngaithei lo hle a ni.