Baghdad-a car bomb puakah mi 13 an thi

Iraq khawpui, Baghdad-ah Thawhṭanni zan khan ice cream dawr kawtah car bomb a puak a, mi 13 an thi a, mi dang 30 chuangin hliam an tuar.

Car bomb puahna hi central Baghdad-a Karadda district a ni a, Muslim thla serh Ramadan puala chaw ngheiten ni tlak hnua in eipuar tura an punkhawm laiin bomb hi tihpuah a ni.

Pawikhawihna a thlen hnu hian Islamic State of Iraq and the Levant(ISIL) Amaq website chuan Shia Muslim pungkhawmte beih an nih thu a tarlang nghal a ni. IS hian Shia Muslim-te hi an bei fo a ni. Thawhṭanni zana bomb tipuaktu hian a tam thei ang ber tihhlum a tum tih an sawi.

Iraq ramah hian Ramadan laiin pawikhawihna a thleng fo a. Nikum July thla Ramadan hmang zo, Karrada market-a pungkhawmte awmnaah truck-ah bomb tihpuah a ni a, mi 300 vel an thi a ni.

Hetih lai hian Iraq security force-te chuan hmarlam khawpui pawimawh, Mosul chu IS firfiakte kut aṭangin an la fel hnai tawh nia sawi a ni. Mosul khua la let tura thla riat beihpui thlak tawh chu zo fel a ni dawn hnai a, hemi rual hian firfiakte hian an theih ang angin ram chhungah pawikhawihna thlen an tum ve mek bawk.