Brazil leh Sri Lanka-te’n tuilian an tuar

Brazil hmarlamah tuilian vangin mi pasarih an thi a, mi 48,000 chuang chu hmun him lamah an insaseng.

Tuilian hi Pernambuco state-in a tuar nasa ber a, mi pahnih an thi a, chenna in 2,600 chhiain mi 44,000 chuang chu chenna nei loin an awm mek bawk. Tuilian hi khaw 15-in an tuar mek a ni.

Pernambuco leh Alagoas state-ah chuan ni eng emaw zat nasa takin ruah a sur tawh a, tui a len bakah hmun tam takah chirh tawlhin harsatna a thlen bawk.

Brazil President Michel Temer chuan tuilenna bial hi a tlawh a, Pernambuco State Governor Paulo Camara pawh a kawm a ni. President chuan state pahniha tuilian tuarte chhawmdawlna tur thawn turin thupek a tichhuak a, hei bakah hian state pahnih ṭanpuina tur hian US dollar matkaduai 183 pek a tiam bawk a ni.

Sri Lanka ram pawhin kum 14 chhunga tuilian rapthlak ber a tawk mek a, tuilian vang hian mi 188 an thi tawh a, thi zat hi an la punchhoh rin a nih thu Red Cross chuan an sawi. Sri Lanka Disaster Management Center chuan tuilen hnu hian chin hriat lohin mi 99 an la awm mek niin an sawi a, hliam tuar mi 112 an awm tih a tarlang bawk.

Sri Lanka-a tuilian hian mi nuai nga chuang zet a nghawng a, ram hrang hrangten tuilian tuarte chhawmdawlna tur an thawn lut tawh a ni.