Sri Lanka sipaite'n sorkar laka nawrh huaihawtte hnawt darh

Sri Lanka President thar lakluh a nih hnuah, nimin zing khan security force-te chuanna khawpui, Colombo-a sorkar hmuna lungawi lohna lantira pungkhawmte an hnawtdarh.

Sipaite hian riot gear leh assault rifle nena inthuamin, April thla aṭanga sorkar laka lungawi lohna lantirtute inkhuarna hmunte chu an tihchhiatsak a ni.

Police thupuangtu Nalin Thalduwa chuan, "Sipai, police leh police special force-te chuan Presidential secretariat chu dan loa luahtute kut aṭanga laksak turin joint operation an nei a ni," a ti. Nawrh huaihawtte leh sipaite innawrnaah hian mi 50 velin hliam an tuar a, mi pakua man an ni bawk.

Nawrh huaihawtte chuan Ningani zan zanlai aṭangin sipaite hian an inkhuarna hmun, President bang ta Rajapaksa elsenna atana 'Gota Go Gama' camp an tih chu hualin, an tichhia niin an sawi. Khaw var hnuah sipai tam zawk chu he hmunah hian thlen belhin, President office hma lam kawngpui sira nawrh huaihawtten puan-in an kaihte chu an thianfai vek a ni.

Thawhṭanni aṭang khan Sri Lanka hi state of emergency hnuaiah an awm tawh a ni. Sri Lanka-in zalenna an neih hnua economy lama an tlakchhiat ber ṭum an tawn avanga mipuiin lungawi lohna lantir a, bang tura an phut an president Gotabaya Rajapaksa chuan an ram tlanchhuahsana Singapore a pan hnuah banna a thehlut a, prime minister hlui Wickremesinghe chu President atan thlan niin Ningani khan lakluh a ni.