Russia-Ukraine-in grain thawnchhuahna tura inremna ziak dawn : Turkey

Ukraine leh Russia chuan Black Sea port kaltlanga wheat leh chaw lam chi, grain thawnchhuahna tura inremna an ziak dawn tih Turkey chuan a sawi.

Khawvela grain thawnchhuaktu lian pahnih, Ukraine leh Russia hian Turkey president Tayyip Erdogan-a office thuchhuah chungchangah hian engmah sawizui an nei lo a, mahse Ukraine president Volodymyr Zelenskyy chuan lawngchawlhna hmunte hi hawn an ni tawh dawn tih a sawi.

Ram pahnihten inremna an siam turah hian grain bakah, fertiliser thawnchhuahna tur pawh a tel nia sawi a ni. Istanbul-a inremna an ziah hunah Erdogan bakah UN secretary-general Antonio Guterres-ten an telpui dawn a, nizanah khan inremna hi an ziah hman beisei a ni.

US chuan inremna siam tur hi lawmawm a tih thu a sawi rualin, Russia-in a zawm tha em tih chu an thlithlai zui reng dawn tih state department thupuangtu Ned Price chuan a sawi nghal.

Ukraine-a lawngchawlh hmunah hian Russia chuan Ukraine wheat leh grain ton mtd 25 vel zet a dan sak a, mahse Russia chuan lawngah ralthuamte an phur em tih lo enfiah turin dikna a nei niin a sawi thung.

Lawngchawlh hmun dansak an nih avangin rel leh kawngpui aṭangin Ukraine hian grain hi European Union ramah te a la thawn chhunzawm tho a, mahse a thawnchhuak tam thei lo thung. Hei vang hian ram hrang hrangah grain lam indaih lohna a thleng nasa hle a, India pawhin ram dang sorkarte ngenna avangin wheat ton maktaduai hnih dawn a lo thawnchhuak tawh a ni.