US President Joe Biden-a'n Covid-19 hri a kai

US president Joe Biden chuan Covid-19 hri a kai tih Ningani khan White House chuan a puang a, mahse harsatna liantham a tawh loh avangin a hna a thawh chhunzawm thei dawn tih a sawi nghal.

Kum 79 mi, Biden hi White House-ah a inkhunghrang dawn a, a thawhpuite nen an inbiakpawh reng avangin meeting ruat lawksa pawh in lam aṭang hian a telpui thei dawn a ni, tiin President Press Secretary Karine Jean-Pierre chuan a sawi.

Biden chuan social media kaltlangin mipuiten an ngaihtuahna avangin lawmthu a sawi a, "Ka ngaihtuah awm loa, hna tam tak ka thawk thei a ni," a ti. President hi antiviral drug Paxlovid pek a ni.

White House chuan Biden-a hriselna dinhmun chu nitin an puan tur thu leh, President nena inhnimhnai te pawh hrilh hriat vek an nih tur thu a sawi.

White House COVID-19 coordinator Dr Ashish Jha chuan Biden hian vaccine dose kim a la tawh a, booster shot vawi hnih a la tawh bawk tih a sawi. Antiviral chak tak hmanga enkawl a nih bawk vangin, a hri kai hi a lak nat theihna chu a hniam niin a sawi. Thawk lamah pawh harsatna a nei lo a, a oxygen level pawh a normal a ni, a ti.