California ram kangin Yosemite National Park a hnaih zel
United States-a California state-a ram kang chuan Yosemite National Park a hnaih zel a, hei vang hian Maripos County-ah state of emergency puan a ni.
Zirtawpni liam ta aṭang khan California-a ram kang, Oak Fire tih hi nasa taka darhin, kangṭhelhtute chuan an la thunun hlei thei lo a ni. Mi 6,000 aia tlem lote chu sawnchhuah an ni tawh a, in 10 a kangral tawh bawk.
Mariposa County-ah state of emergency puan hian ram kang ṭhelhna turin state chuan sorkar laipui aṭangin puihna a dawn theih phah dawn a ni.
Kangṭhelhtu mi 400 vel leh helicopter pali chu ram kang ṭhelh tur hian tirh an ni a, CalFire tana thupuangtu Natasha Fouts chuan kartawp velah lo chuan kangmei hi ṭhelh mih hman an inbeisei loh thu a sawi.
United States-a hmun tam zawkte chuan boruak lum tak, heatwave an hmachhawn mek a, state ṭhahnem takah heat advisory warning an puang tawh a ni. Mariposa County-ah Inrinni liam ta khan khawlum lam chuan 96F (35.5C) a kai a, ni eng emaw zat chhung hemi level-ah hian a awm an rin thu an sawi.
Yosemite National Park hi Oak Fire thlen mekna hmarchhak lamah a awm a, he park hi khawvela thingkung upa leh lian ber ber, sequoia thingkung awmna a ni. Thla tir khan kangmei dang vangin kangral mai thei dinhmunah ding mah se, kangṭhelhtute chuan an venghim thei a ni.
US Forest Service chuan Zirtawpni liam ta khan heng thingkungte vawnghim turin theihtawpa hma an lak thu sawiin, kangmei tizual thei leia hnimte leh thil dangte pawh a paihfai thu a sawi.