Sri Lanka PM leh President chenna-a bungrua 1,000 chuang a bo

Sri Lanka-a sorkar laka lungawi lohna lantirten Presidential Palace leh Prime Minister official residence an luhkhung hnuah, building pahniha bungraw hlu tak tak 1,000 chuang ruk chhuah an nih thu police-te chuan an sawi.

July 9 khan sorkar laka lungawi lohna lantirtute'n president hlui Gotabaya Rajapaksa leh prime minister hlui Ranil Wickremesinghe chenna chu luhkhungin, an ramin economy lama harsatna lian tak an hmachhawn mekah mawhphurtuah puhin, sorkar building pawh an hal a ni.

Department of Archaeology-a senior official chuan Pathianni khan hmanlai thil hlu, antique engzat chiah nge bo tih chu chhuichhuah a harsat tur thu sawiin, police lam chuan bungraw bo hi 1,000 chuang nia an chhut thu a sawi.

President thlan thar Ranil Wickreme­singhe chuan lungawi lohna lantirtu, mipuite dikna chanvo neih chu a zahsak thu a sawi rulain, Presidential Palace, leh Prime Minister chenna in bakah, sorkar building dangte nawrh huaihawttuten an luhkhung hi a remti dawn lo tih a sawi. Sipaite leh police-te pawh sorkar hmun leh Parliament-a luh tum mipuite dang tura a ṭul anga hma la tura a hriattir leh, thuneihna pawh a pek thu a sawi bawk.