Kabul-a bomb puakah mi 80 an thi

Afghanistan khawpui, Kabul-ah nimin khan car bomb chak tak a puak a, mi 80 an thi a, midang 320 chuangin hliam an tuar

Afghanistan Ministry of Interior Affairs-in a tarlan danin, bomb puak hi a na hle a, a puahna Wazir Akbar Khan area-a 14th Street-a km khat chuanga hlaa in leh dawr tukverh darthlalangte pawh a nghawr keh thei niin a sawi. Motor pawh 30 chuang a chhia nia sawi a ni bawk. Bomb puak vanga thi zingah hian hmeichhia leh naupang eng emaw zat an tel.

Public health ministry thupuangtu, Ismail Kawasi chuan hliam tuar zinga mi 50-te chu Kabul-a hospital hrang hrangah enkawl an nih thu a sawi.

Kabul police thupuangtu Basir Mujahid chuan bomb puahna hi Germany embassy bul a ni a, Indian embassy atanga meter 50 leka hla a ni bawk. A bul velah hian compound leh office pawimawh dang pawh a awm nual niin a sawi.

Nimina pawikhawihna thleng hi eng pawl mahin an tih niin an la chhal lo a, mahse Taliban firfiak pawl chuan thla hmasa khan ramdang sipaite lakah na zawka beihpui thlak an tum thu an lo sawi tawh a ni. Tun hnaiah Taliban firfiakte hian Afghanistan hmarlama Mazar-e Shariff -a Afghan army training camp chu beiin, sipai 135 an thi a, he pawikhawihna thleng vang hian defence minister leh army chief of staff pawh an lo ban phah tawh a ni.

Afghanistan-ah hian America sipai 8,400 an la awm mek a, anni bakah hian NATO hnuaia an thawhpui ram dang sipai 5,000 vel an awm bawk.