Philippine-a bomb thlak sual vangin sipai 10 thi

Philippine sipaiten Marawi City-a Islam firfiak, Maute pawl laka beihpui an thlaknaah bomb an thlak sual vangin sipai 10 an thi a, mi dang pariatin hliam an tuar.

Philippine chhim lama Marawi khawpuiah hian hun eng emaw chen sipai leh firfiakte hi an inbei tawh a, firfiakte hian khawpui hi an a luah avangin umchhuah tumin beihpui an thlak mek a ni. Nilaini khan sipaite hian firfiakte beih nan ṭum hnih bomb an thlak a, a ṭum khatna hian a target a fuh a, mahse a ṭum hnihna hian sipaite awmna hmun zawk a fuh ta a ni.

Defence Secretary Delfin Lorenzana chuan sipaite zawk kah fuh an ni chu pawi a tih thu sawiin, tihsual a awm niin a sawi. He thil thleng hi chhui chian a nih tur thu sipai thupuangtu, Brig. Gen. Restituto Padilla chuan a sawi a, hetianga tihsual hi thleng nawn tawh lo tura an duh thu a sawi bawk. Sipaite hian kar hmasa aṭang khan firfiakte hi khawmual lama an beih bakah rocket hmangin an kap bawk a ni. Maute firfiakte hi building chhungahte an tawm a ni. Nilaini aṭang khan sipaite hian firfiakte beih nan hian SF-260 thlawhtheihna an hmang ṭan a ni.

Marawi-a Maute firfiak leh sipaite inbeihnaah hian sipai 38 leh firfiak 120 an thi tawh a, civil mi 19 an thi tel bawk. Firfiak thi zinga hian Saudi, Malaysian, Indonesian, Yemeni leh Chechen mite an tel niin Lorenzana chuan a sawi.