Russia-in missile hmangin IS firfiak bei

Russia chuan Mediterranean tuipuia indolawng leh tuihnuai lawng a dah aṭangin Syria-a Islamic State (IS)-te chu missile hmangin a kap.

Russia sipaite chuan thuchhuah siamin, Nilaini khan indolawng Admiral Essen leh tuihnuai lawng Krasnodar aṭangin Syria rama Raqa-a IS firfiakte hmun pawimawhte beih nan missile pali kahchhuah a nih thu a sawi. Heng missile-te hian an target an fuh vek niin a sawi bawk. Russia chuan missile an kah chhuah hma hian US, Turkey leh Israel pawh an hriattir lawk thu a sawi. Hlawhtling taka target kahfuh a nih thu pawh hi Defence Minister Sergei Shoigu chuan President Vladimir Putin pawh a hrilh nghal a ni. Syria President Bashar al-Assad-a kaihhruai sorkar thlawpin, Russia hian kum 2015 aṭang khan sorkar laka helte lakah beihpui a thlakpui ṭan a ni.