Brazil-a company-in dollar tld 3.2 chawi dawn

Khawvela meat packing company lian, JBS-a shareholder lian ber, Brazil rama J&F Investimos chuan eiruknaa a inhnamhnawih avangin dollar tluklehdingawn 3.2 (Brazil pawisa real tluklehdingawn 10) an chawi dawn.

Prosecutor-te chuan kum­in December thla aṭangin company hian sum chawi tur hi a pe ṭan dawn a, a pek tlak nan kum 25 hun pek a ni tih an sawi.

J&F neitu pahnih Joesley leh Wesley Batista-te chu kar hmasa khan board chairman an nihna aṭangin an bang tawh a, thu an zawhnaah an rama politician 1,900 dawn hnenah thamna sum real maktaduai 600 an pek thu an sawi.

Joesley Batista hian prosecutor-te hnenah audio tape, President Michel Temer-a’n witness hnena thamna sum pek a thlawp thu a sawina pawh a pe a, hei hi press lamah a putchhuak a, hei vang hian President hian sawi­sel a tawk nasa a, bang tura nawrna pawh a na hle. Temer chuan he audio tape hi a dik ngei tih a sawi a, hemi rual hian tihsual engmah a neih loh thu a sawi thung.

Brazil rama eirukna thleng lian ber chhuina, Operation Car Wash chu kum thum chuang chhui ni tawhin, he thila inhnamhnawih sorkar hnathawk lian leh politician tam tak man leh thubuai siam­sak an ni tawh a ni.