Paris Accord aṭangin US inhnukdawk
Khawvel sik leh sa inthlak chho zel tur venna atana khawvel ram hrang hrangten inremna an lo siam tawh, Paris Accord aṭangin US a inhnukdawk ta.
US President Donald Trump chuan Paris Climate Agreement chuan an ram tan sum leh economy lamah phurrit tak a thlen niin a lo sawi tawh a, Ningani khan he inremna aṭanga US a inhnuhdawh thu hi a puang ta a ni.
President Trump-a thutlukna hi ram hrang hrang hruaituten an sawisel a, hetihlai Trump chuan Paris Climate Agreement siama inremna kalpui dan chu a sawisel thung. He inremna siam hnuaiah hian China leh India chu duhsak bik niin Trump chuan a sawi a, China chu coal plant tam tak siam phalsak a ni a, India pawh kum 2020 thleng coal siamchhuah zat a leta tihpun phalsak niin, US erawh phalsak a ni ve lo thung a ni, a ti. He inremna hi US tan chuan hekna hlir a ni a, US hloh ang zat hi ramdangten an hloh ve lo a ni, a ti.
Trump chuan Paris Agreement-ah hian US tan dik taka rorelsak a nih theih nan inremna hi siamṭha tura inbiakna kalpui a tum thu a sawi.
European Commission President Jean-Claude Juncker chuan President Trump-a thutlukna siam chu a dik lo a ni a ti a, US President hlui Barack Obama pawhin Trump chu US hmalam hun thlir loah a puh bawk. France, Germany leh Italy-te pawhin thuchhuah inṭawm siamin, Paris Agreement chu siamṭha tura inbiakna neih theih a nih tawh loh thu an sawi.
UN Framework Convention on Climate Change (UNFCCC) pawhin Paris Climate Change Agreement chu ram 195-te’n kum 2015, December thlaa lungrual taka an siam tawh a ni a, ram pakhat duhdan avanga ngaihtuah ṭhat theih a nih loh thu a sawi bawk.
Donald Trump hi US President zinga global climate deal aṭanga inhnuhdawk pahnihna a ni. Kum 2001 khan khatih laia US President, Republican member vek George W Bush chu Kyoto Protocol on Climate Change aṭangin a lo inhnudawk tawh bawk a ni.
President Trump-a thutlukna siam hi US firm lian ṭhenkhatte chuan an sawisel a, an zingah hian General Electric, Facebook, Goldman Sachs leh Walt Disney-te pawh an tel. Sawiseltute chuan Trump-a ‘America first’ policy chuan US company-te tan ram pawn lama an hnathawh tur thlengin a nghawng thei dawn niin an sawi. Hetih lai hian US coal firm-te erawh chuan lawmawm an tih thu an sawi thung a, hna tam tak an hum thei dawn niin an sawi.