Jerusalem-ah US embassy sawn dawn rih lo

US official chuan Israel rama US embassy, Tel Aviv-a awm chu Jerusalem-ah sawn a ni dawn rih lo tih a sawi.

US President Donald Trump chuan US embassy hi Jerusalem-ah sawn a tum thu alo sawi tawh a, he hi Palestinian leh Arab ram hrang hrangte chuan an sawisel a ni. Mahse official chuan President Trump chuan embassy hi a sawn mai rih dawn lo a, hemi rual hian a ṭhulh ta tihna erawh a nih loh thu a sawi. Palestinian chuan ram hran an din hunah East Jerusalem hi khawpui atan hman an tum a, Israel khawpuiah an pawm thei lo a ni. Mahse Israel chuan Jerusalem chu hmasangaṭanga tawha an khawpui a nih thu sawiin, ṭhendarh a remti ngai dawn lo tih a sawi thung.

President Trump-a’n embassy sawn hun a tikhawtlai chu pawi a tih thu, Israel Prime Minister Benjamin Netanyahu chuan a sawi a, hemi rual hian Trump leh Israel in-ṭhianṭhatna chu an ngaihhlut thu leh, hun remchangah embassy sawn ala tum tho tih a sawi chu lawmawm a tih thu a sawi.