Silai kengin Manila casino luhkhung

Philippine khawpui Manila-a casino chu silai keng pakhatin luhkhungin a silai a hmetpuak a, gaming table eng emaw zat a hal bawk a, meikhu chhuak a nasat avangin thawchhamin mi 36 an thi.

Manila police hotu Oscar Alabayalde chuan he pawikhawihna thlen hun hi Ningani zan zanlai pelh hnu deuh a nih thu a sawi. Resorts World Manila complex-a Casino beitu hian casino chhunga police officer-te a kap a, gaming table eng emaw zat a hal zui a ni. He thil thleng avang hian casino-a awmte an chiai nasa hle a, an innekbuainaah mi 70 chuangin hliam an tuar bawk a ni. Kangṭhelhtute chuan ruangte hi gambling room-ah hmuin meikhu hip luh nasat vanga thi an nih thu an sawi. Ruang an hmuhah hian silaia kahhna hnuhma engmah hmuh a ni lo. Casino a beih hnuah pawikhawihtu hi casino chips nen a tlanchhuak a, mahse nimin zing khan a bula hotel-ah thia hmuh a ni a, police-te chuan a inhalhlum nia a lanthu leh, a hmel pawh hriat theih loha a kan chhiat thu an sawi. A silai hman, sub-machine gun leh calibre gun chu police-te’n an hmu tawh a ni.

Police-te chuan pawikhawihtu hi ramdang mi nia a lan thu sawiin, English a hmang a, pa lian tak leh mi ngo a nih thu an sawi. Casino hi Ninoy Aquino International Airport leh air force base bula awm a ni.