Myanmar sipaite'n Democracy activist 4 tihlum

Myanmar sipai thuneitute chuan democracy activist palite chu firfiak zawnga chete puiah puhin an tihlum. Kum tam tak hnua Myanmar rama thiam loh chantira intihlumna a thlen lehna hmasa ber a ni.

Kumin January thla khan heng mi palite chungthu hi closed-door-a ngaihtuah a ni a, thi turin an chungthu relsak an ni. Mi palite hi nikuma civil sorkar paihthlatu, sipaite beilettu helpawl pui ṭhinah sipai sorkar chuan a puh.

Sipai sorkarin anmahni dodaltu a tihhlum takte hi - Ko Jimmy tia hriat lar Kyaw Min Yu, lawmaker hlui leh hip-hop artist ni bawk Phyo Zeya Thaw bakah activist dang pahnih hriat hlawh lutuk lo Hla Myo Aung leh Aung Thura Zaw-te an ni.

An pali hian counter-terrorism law leh penal code hnuaiah thubuai siamsak an ni a, an hremna hi tanin dan hmanga lekkawh a nih thu chauh an tarlang. A hmaa Myanmar-a thiam loh chang, tihhlum tura hremna pekte chu khaihlum an ni ṭhin.

Kum 53 mi, Ko Jimmy hi kum 1988-a zirlaite'n an ram sipaite laka nawrh an huaihawtna kawnga bulṭantu, Burmese pro-democracy movement 88 Generation Students Group zinga mi a ni. Democracy movement-a a tel avangin vawi tam tak tanina khung a nih hnuah kum 2012 khan chhuah zalen a ni. Nikum October thla khan Yangon-a a chenna inah ralthuam leh silai mu a kawl vang leh National Unity Government-a advisor a nih avangin an man leh a ni.

Kum 41 mi, Phyo Zeya Thaw hi NLD lawmaker hlui leh Suu Kyi lamṭang hnai tak a ni. Hip-hop artist hlui ni bawk hian sipai dodalna lam hla thu a chham fo avangin sipaite ti thinurtu lian tak pakhat a ni. Nikum November thla khan firfiak zawnga chea puhin man a ni ve bawk.

Activist dang pahnih Hla Myo Aung leh Aung Thura Zaw-te chanchin erawh hriat tam vak a ni lo. Sipai hnena a ruka thu thlentu, hmeichhe pakhat an thah avangin thi tura hremna pek an ni.

Activist group, Assistance Association of Political Prisoners (AAPP) chuan Myanmar-a thiam loh chantir, thi tura an hrem hnuhnun ber chu kum 1980 chho bawr vel a nih thu an sawi.

Sipai thupuangtu Zaw Min Tun chuan thla hmasa khan thi tura hremna, death penalty hi a thlavang hauhin, ram tam takah hman a nih thu a sawi. "Security force tiam lohin civil mi pawisawi lo mi 50 vel chu anmahni vang hian an thi a ni," tiin TV-a news conference a neihah mi palite chungchang hi a sawi. "Eng vangin nge rorelna dik lo in tih theih?" tia zawtin, "A hunah chuan a ṭul anga chet lak a ngai ṭhin a ni," a ti.

An tihhlum tak Phyo Zeyar Thaw-a nupui Thazin Nyunt Aung chuan a pasal an tihhlum thu hi hrilhriat a nih loh thu a sawi. Midang chhungte erawh biakpawh theih an la ni lo.

Nikum February 1-a Myan­mar sipaiten civil sorkar thuneihna an hnehchhuh hnuah tualchhungah buaina a thleng zui reng a ni. AAPP chuan sipaite hian sipai sorkar duh lohna lantirtu zinga mi 2,100 chuang an that tawh tih a sawi a, mahse hei hi sipai lam chuan pawm loin, a nihna bakin an sawi an ti ve thung.